Turmush — Талас шаарынын 66 жаштагы тургуну Салкын Норузбаева «Шайыр апалар» тобуна ырдап, чыгармачылык менен алектенип келет. Аймактык кабарчы аны менен таанышты.
Өзүнүн айтымында, Талас районунун Үч-Эмчек айылында туулган.
«1975-жылы 10-классты аяктагам. Үй-бүлөлүк шартка байланыштуу ошол эле жылы айылыбыздагы фермага саанчы болуп иштеп баштадым. 1976-жылы жолдошум Койчуман Норузбаевге турмушка чыктым. Экөөбүз үйлөнүп эле чабан болуп тоого чыгып кеттик. СССР тараган маалда, ар бирибиз чарбага бөлүнүп, анан ар кандай жумуштарда иштеп оокат кылып баштадык. Бир топ убакыт Россияда эмгектенип жүрдүк. Ошол жактан «Талас» коому түзүлүп, ал жактан «Шайыр апалар» тобу негизделип, катылган таланттарыбыз ачылды. Өмүрү комуз кармабаган жаным, ошол топтон колума комуз алып үйрөндүм. Москва шаарынын тегерегиндеги 3-4 сааттык жолдогу аймактар калган жок, көп жерлерде концерт коюп чыктык. Гастролдоп Воронежке чейин барганбыз. «Чолпонбай Түлөбердиевдин жердештери келди» деп, бизди ар үй сайын тамак берип сыйлашкан. Алар Чолпонбай Түлөбердиев дегенде өтө сый урмат көрсөтүшөт экен.
Эсимде калган концерт, бул 2021-жылы болду. Манас күнү өтүп, Манастын 40 чоросун «Шайыр апалар» тобундагылар аткарганбыз. Ушундай музыканын коштоосунда чыктык, өзүбүздүн жүрөгүбүз дүркүрөп, аябай калтырак сезим болгон. Орустар дагы ордунан туруп кол чабышкан.
Биздин топту Жаңыл деген кызыбыз уюштурган. Азыр ал жакта 6-7 апа калды. Бул жакка бешөөбүз келдик. Ал жакта мамлекеттик поликлиникада 5 жыл эмгектендим. Анан Таласка келип, бул жакта бала бакчада иштеп жатам. Бул жакта дагы коллективим абдан сонун адамдар. Кандай иш-чара болбосун активдүү катышам. Мени «француженка» деп атап алышат. Иш-чараларга атайын француз айымынын образын аткарып, кадиресе, француз тилинен сөздөрдү жаттап чыгам. Образым кыздарга абдан жаккандыктан ошондой атап эркелетип коюшат. Чыгармачылыкты жакшы көргөн жаным аларга жакса өзүм да жаш баладай сүйүнүп калам», - деди ал.
Салкын Норузбаева 3 кыз, 3 баланын апасы.