Бөлүмдөр
Ишемби, 21-июль
Талас

Жаш талант: Индирахан менен Нурак шахмат, арифметика боюнча чет өлкөлөрдөгү сынактарга катышууда (фото)

Turmush -  Талас шаарынын 10 жаштагы тургуну Индирахан Жаныбекова менен 8 жаштагы иниси Нурак Жаныбеков шахмат жана менталдык арифметика боюнча ийгиликтерди жаратууда. Алардан аймактык кабарчы кабар алды.

Индирахандын айтымында, шахмат боюнча ийримге 7 жашынан тарта катыша баштаган. Быйыл 4-классты аяктады.

«Шахматка болгон кызыгуума ата-энем түрткү болушту. Үйдөн шашки ойногонду жакшы көрчүбүз. Анан иним экөөбүздү шахмат үйрөнсүн деп ийримге алып барышкан. Шахматта дагы ой жүгүртүү керек. 2016-жылы Ысык-Көлдө өткөн шахмат боюнча эл аралык турнирден 1-орунду алгам.

1 жылдан кийин эле менталдык арифметка курсуна бара баштадым. Менталдык арифметика боюнча 2017-жылы Таиландда 24 өлкөнүн балдары катышкан сынакта 2-орунду алгам. 2018-жылы Ысык-Көлдө менталдык арифметика боюнча эл аралык олимпиадада 1-орунду алдым. Дубайда өткөн сынакта 3-орунду камсыздадым», - деди ал.

Каарманыбыз буга катар эле шахмат боюнча мелдеште болгон кызыктуу окуяны айтып берди.

«Оюнда кызыктуу учурлар болот. Анын бири Ысык-Көлдөгү эл аралык турнирде болгон. Анда Кытайдан, Моңголиядан чемпиондукту алып келген балага туш келип утуп алгам. Ошондо бала да, апасы да чычалап, калыстарды ортого салып кайра ойноткон. 1 партия ойноп дагы утуп алгам. Ошондо тиги бала «мен кыздан жеңилдим» деп аябай ыйлаган. Апасы да урушуп алып кеткен», - деди Индирахан.

Иниси Нурактын айтымында, быйыл 2-классты аяктады.

«5 жашымдан баштап шахматка бара баштагам. Эжеме кошулуп менталдык арифметикага дагы барам. 2018-жылы Дубайда өткөн менталдык арифметика боюнча мелдеште чемпион болдум. 6 мүнөттө 80 эсеп чыгар деп берилген. Аны өз убагында бүтүрдүм. 2-турда 40 эсепти 2 мүнөттө чыгарып бүттүм. Быйыл шахмат боюнча эл аралык турнирде 1-орунга ээ бодум.

Келечекте көп тилди окуп, саякатчы болсом дейм. Индирахан дарыгер болсом деп кыялданат. Чоң турнирлерде биз 1 партияны 2 же 3 сааттан ашык ойнойбуз. Бир оюнда атаандашым жүрүш кылып, менин жүрүшүмдү күтүп калды. Мен жүрүшүмдү ойлонгуча ал күтүп отуруп уктап калыптыр. Ошондо калыстар келип ойготуп залдын бардыгы күлгөн», - деди Нурак.

Шахматчы бир туугандардын апасы Наргиза Орозбаева балдары менен күнүгө кечкисин 1,5 саат убакыт отурат.

«Индирахан менен Нурак 4 бир туугандын улуулары. Баланын ийгилиги ата-энеге чоң бакыт. Таланттуу уул-кыздарды колдогон, түшүнгөн жакшы демөөрчүлөр көп болсо деп ойлойм. Шартка байланыштуу кандай гана таланттар ачыкка чыкпай калып жатат. Балдарыма жүрөгү толо ыйман, ден соолук, акыл, ынтымак тилейм», - деди ал.

Таластык окуучулар Дубайдагы арифметика боюнча мелдештен алдыңкы орундарды ээлешти (фото)

Сиздин реакция: Эркек Аял
Күлкүлүү
Капалуу
Таң калуу
Ачуулануу
Необходимо авторизоваться
Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Кароолор: 575
Комментарии
Для добавления комментария необходимо быть нашим подписчиком
Көп окулду
×