Бөлүмдөр
Жекшемби, 18-ноябрь
Талас облусу, Талас 08.02.2018 13:48

Айыл турмушу: Мугалим Г.Осмонкулова Индия, АКШга чейин барып, тажрыйба топтоп келген (фото)

Turmush -  Талас шаарындагы 59 жаштагы англис тилчи мугалим Гүлгаакы Осмонкулова Индия, Америкага чейин барып, тажрыйба топтоп келген. Аймактык кабарчы мугалим менен таанышты.

Өзүнүн айтымында, Кыргыз мамлекеттик университетинин англис тили факультетин 1980-жылы аяктаган. Эмгек жолун Талас районунун Арал орто мектебинде англис тилч болуп баштаган. Учурда Талас шаарындагы чет тилдер багытындагы мектепте иштеп жатат.

«1999-жылы январь-март айларында Индиянын Хайдарабад шаарындагы Борбордук тилдер институтунда окуудан өтүп келгем. 2007-жылы Американын Небраска штатындагы университетте 6 жума окуп келдим. Небраска штатынын Линкольн шаарынын мериясынын ардак грамотасын алгам.

Мен окуткан окуучуларым Америкада билим алып жатышат. Окуучуларымды өзүмдүн балдарымдай көрөм. Лицейде 8-класстан жогоркулар менен иштешем. Жатаканада жаткан окуучулар менен да өз ара иштерди жүргүзөм. Окуучулардын аң-сезими ар кандай болот. Кээ бирине тамаша катарында айтып жеткизем. Бирок азыркы рейтинг боюнча окуучулардын билимге умтулуусу начар. Мурдагы бүтүрүүчүлөрдүн изденүүсү күч болчу. Азыр интернет тармактарынанбы, айтор билимге умтулуу начар», - деди ал.

Мугалим эмгек жолунда бир нече сыйлыктарга ээ болуп, «Билим берүүнүн мыктысы» төш белгисин алган. Илимий-усулдук эмгектери жергиликтүү жана республикалык массалык маалымат каражаттарына байма-бай жарыяланып турат. Мисалы «Лицей чет элдик меймандын көзү менен», «Изденүү ийгилик ачкычы» жана башка макалалары басма сөз беттерине чыккан.

Мугалим айым жолдошу Шыгалиев Бакыт менен 2 уул, 3 кыздын, 13 неберенин ата-энеси болушту.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Комментарии
Для добавления комментария необходимо быть нашим подписчиком
Көп окулду
×